Clubhouse bû cihê Şanoya Kurdî: Sond dixwim emê Şanoya Kurdî derbixin qada navnetewî

Rebîn Ozmen

DUVAR - Şanogerên kurd yên li bajar û welatên cuda, li ser platforma Clubhousê bi hev dû re lîstikeke şanoyê pêşkeşî hezkiriyên Şanoya Kurdî kirin. Lîstika Eugene Ionesco ya bi navê 'Heft û Heşta Du Kesan', bi wergera Dr. Eser Çetin, lîstikvaniya Berri Shemdin û Şanoger Tuncay Ozel li ser platforma civakî Clubhouseyê hat pêşkêşkirin. Muzîka lîstikê Erdem Altınses jixweberî jenand. Di xebata lîstikê de bi tevahî şeş kesan cih girt û guhdarên ku xwest dikarîbûn alîkariya darayî jî, li şanogeran bikin.

Berê şanoyên radyoyê hebûn. Demekê li Radyoya Rewanê jî ev şano bi kurdî dihatin pêşkêş kirin. Piştî salên dirêj û di vê serdema pandemiyê de li ser platforma civakî ya bi deng Clubhousê şanoyeke kurdî hat lîstin. Platforma ku meriv dikare tê de odeyan ava bike û gellek kes beşdarî odê bibin û bi deng bi hev re biaxivin, di demeke kurt de bala gellek kurdên ku medyayên civakî bikartînin kêşand. Di vê platforma ku gellek bikarhênerên kurd jî jê sûdê werdigrin de Şanogerên Kurd bi rêbaza Şanoya Radyoyê, lîstikek bi kurdî ya şanoyê pêşkêş kirin. Lîstik rastî eleqeya baş hat û ji aliyên gellek guhdaran ve hat şopandin. Herwiha guhdarê ku bixwestana jî dikarîbûn bi qasî ku dixwazin alîkariyeke darayi bidin lîstikvanan ku di vê pêvajoya pandemiyê de bêkar mane.

Lîstika ku Berri Shemdin hilbijart û Dr. Eser Çetin wergerand bi muzîka Erdem Altınses hat pêşkêş kirin û Berri Shemdin û Tuncay Ozel jî lîstin. Herwiha di lîstikê de sê kesan jî wekî fîguran, kondivît û teknîkerê efektan alîkarî dane lîstikvanan. 120 kesan ji serî heta dawiyê li lîstikê guhdar kirin. Gellek kesan jî li hin beşên lîstikê guhdar kirin û derketin.

'LÎSTIK GOR REWŞA KURDISTANÊ YE'

Berri Shemdin a lîstikvan ku li Londonê dijî xwest ku li qada Clubhousê jî Şanoya Kurdî hebe. Shemdin diyar kir ku; “Lîstik min hilbijartiye û tam li gor rewşa Kurdistanê ye ku şer lê diqewime û nîşan dide ka şer çawa bandorê li kesen bê alî jî dike. Malbatên ku li ber çavên wan şer diqewime xema wan nîne û takekes in. Herwiha bi vê yekê min xwest ku ji şanogerên Kurdistanê re, ji aliyê aborî ve jî bibim alîkar. Û li ser platforma Clubhousê, di jêr navê Kurdish Art Club, bi şanogerên kurd re, şanoya clubhousê berdewam bike.”

Shemdin hestên xwe jî weha aşkere kirin; “tecrubeyeke cûda bû, ne partnerê min li ber min e, ne ez bertekên temaşevanana dibînim, an dibîhîzim, ne jî karim actingek bikim. Gellek sînor hebûn lê ew jî dengê da rêyek fîreh vedikir. Min gellek caran dûblaj û çîrok qeyd kiribûn lê di clubhousê da partnerê min li Stembolê ez li Londonê, mûzîkjen li Amedê, fîgûran yek ji Vanê, Almanyê û Swêdê bû. Temaşevan ji çar perçeyên Kurdistanê û li diasporayê bûn. Tecrubeyek pir xweş bû. Di şanoyê da ez li mekanekî bûm, di fîlm û rêzefîlman da jî pişt wî karê diqediya lê ez çûm mala her kesî û em zindî behevre bûn.”

Shemdin hestên xwe jî weha anîn ziman: “Tiştekî ku min ji temaşevanekî bihîst, ez pir hestewar kirim û dixwazim parvebikim. Jinekê got: ez bi diya xwe û pîrika xwe re, em di karantîna de bûn û her kes çend roj bûn di odeyên cûda da bûn, lê dema lîstikê destpêkir pîrika min û dayika min hatin odeyê. Her ku Berri (ez) bersivên mêrê xwe dida çêra dikir pîrika min ji kenînan dixerikî. Ez gellek kêfxweş bûm ez çûme Wanê maleke kurd û ji sê nivşên jin re bûme mêvan, me bi hevre demêk xweş jiya.”

'SOND DIXWIM EMÊ ŞANOYA KURDÎ DERBIXIN QADA NAVNETEWÎ'

Lîstikvan Tuncay Ozel jî hestên xwe weha anîn ziman: “Rastî jî em nêzê salekê ji sehneyê dûr in, me xwest em tiştek nû biceribînin me got tirk dikin çima em nekin îro jî me dilê xwe rehet kir, wek ku em pêşberî temaşevanan bin me hîs kir, bi rastî keda ku me da vê lîstikê ne kêmî lîstikeke ku li hemberî temaşevanan tê lîstin bû, ez kêfxweş im ku di nav projeyeke wisa de bûm, gotina dawî ku ez bibêjim derfet bidin me kurdan li ser navê xwe sond dixwim emê (şanoya kurdî) derbixin qada navnetewi.”