KÜLTÜR-SANAT

Perdê şanoya kurdî bi destana Mem û Zı̂n vedibe

Şermola Performans, perdê şanoyê bi destana Mem û Zı̂n vedike. Bi vê berhemê re Şermola Performans wê êdî li Batmanê jî bi berdewamî perde vebike û projeyên nû biafirîne.

02 Kasım Salı 2021 Saat: 16:19 Güncellenme: 03 Kasım Çarşamba 2021 Saat: 00:31

DUVAR - Şermola Performans nêzîkî salekê ye xebatên online çêdike, li ser dîroka şanoyê, nivîsîna dramatîk û teoriyên lîstikvaniyê dersan dide. Her wiha di vê serdemê de bi lîstikvanên ku li bajarên cuda dijîn re jî xebatên xwendinê û ceribandinên lîstikên onlîne pêk anî. Bi saya van xebatan nivîskar û derhênerê Şermola Performansê Mîrza Metîn lîstikvanên wek Pelda Bal, Kenan Demîr, Ronî Dildar û dramaturg Zelal Angay nas kir û biryar da ku li Batmanê bi wan re li ser lîstikekê bixebite.

XEBATÊN LÎSTIKA MEM Û ZÎN BERÎ DEH MEHAN DEST PÊ KIR

Xebatên lîstikê berî deh mehan li ser bernameya Zoomê dest pê kir û Mîrza Metîn ji bo ku di hişê lîstikvanan de bingehek ava bike bi wan re li ser têgehên wek mîtolojî, rîtuel, lîstik, performans, mêtingerî, çanda gelerî, vebêjî û hunera hemdem xebitî û li ser van hêmanan xwendinên dirêj pêk anî. Metîn piştî van xebatên teorîk ji Almanyayê hat Batmanê û tevî lîstikvanan dest bi xebata piratîk kir. Dramaturg û alîkara derhêner Zelal Angay ji bo vê xebatê ji Enqerê, dansvan û koreograf Arjen Brûsk jî ji Stembolê hat Batmanê.

Bi sedan dengbêj û çîrokbêj hene ku îro jî destanên kurdan bi awayekî kilamkî û vebêjkî îcra dikin. Mem û Zîn jî yek ji wan destanan e ku bingeha xwe ji destana Memê Alan girtiye. Her wiha Dengbêj Reso jî yek girîngtirîn ji dengbêjan e ku destana Mem û Zînê bi kilamkî û vebêjkî îcra kiriye.

Mem û Zîn ku bi derhêneriya Mîrza Metîn ve dertê ser dikê xwe dispêre vê pirsê: “Kilamek, stranek, çîrokek ango destaneke gelêrî, bêyî ku weke teksteka şanoyê ji nû ve bê nivîsandin, çawa dikare bi rengekî nûjen bê sehnekirin?”

ŞANOYA MEM Û ZÎN YEKEM BERHEMA ŞÊWAZA 'DÎWAN'Ê YE

Her wiha Mîrza Metîn bi salan e bi navê 'Dîwan'ê ango 'Dîwana Lîstikvaniyê' kargehan çêdike û bi lîstikvanan re li ser hereket, deng, nefes û vebêjiyê dixebite û hemû xebatên xwe dispêrîne dengbêj, çîrokbêj, govendger û şivanan; û van hêmanan bi rengekî nûjen di xebatên xwe de bi kar tîne û hewl dide ku şêwazeke xwemalî ya xebata şanoyê biafirîne. Lewre şanoya Mem û Zîn yekem berhema şêwaza 'Dîwan'ê ye ku dê di 3ê Mijdarê saet 19.30an de li Batman Yenîsahneyê yekem car derkeve pêşberî temaşevanan.

Bi vê berhemê re Şermola Performans dê êdî li Batmanê jî bi berdewamî perde vebike û projeyên nû biafirîne. Şermola Performans her wiha xebatên xwe li Stembol û Almanyayê jî didomîne.

Ji bo agahiyên berfirehtir hûn dikarin li malpera www.sermola.com binêrin. Dîrokên din ên performansa Mem û Zîn ev in: 4, 16, 30ê Mijdarê, saet 19.30. Cih: Batman Yenîsahne

Çavkanî: Dengbêj Reso
Konsept/Derhêner: Mîrza Metîn
Lîstikvan: Pelda Bal, Kenan Demir, Roni Dildar
Dramaturg/Alîkara Derhêner: Zelal Angay
Koreograf/Rahêner: Arjen Brûsk
Sêwirînerê Ronahiyê: Mîrza Metîn
Fotograf: Bariş Evîz

Etiketler Mem û Zı̂n Şermola Performans